Movet dae su 16 a su 20 de nadale 2021 in Casteddu Across Asia Film Festival, su fèstival internatzionale de su tzìnema in contu de sos limbàgios prus noos de s’iscena asiàtica contemporànea.

Nàschidu cun sa punna de fàghere a connòschere a su pùblicu custa produtzione tzinematogràfica de s’Estremu Oriente, creschende sas cuncàmbias culturales internatzionales e favoressende una visione interculturale prus aprofundida, su fèstival torrat in fines in presèntzia, a pustis de su resurtadu bonu meda de sas editziones de in antis in Casteddu e in Roma (MAXXI, Museu natzionale de sas artes de su sèculu XXI). Cun unu programma mannu chi previdet momentos de formatzione e addòbios cun istràngios internatzionales, su fèstival proponet un’esploratzione diversificada, ocannu cuntzentrada in particulare subra sa tzinematografia a su feminile e subra cussa giaponesa indipendente.

Cun sa diretzione artìstica de Stefano Galanti e Maria Paola Zedda, Across Asia Film Festival est unu progetu de ZEIT – Art Research – assòtziu culturale chi si interessat de su promovimentu de s’arte, de sa prestatzione e de sa tzinematografia – cun su contributu de sa Regione Autònoma de Sardigna, de su Comune de Casteddu e de sa Fundatzione de Sardigna, cun s’agiudu de sa Fundatzione Sardigna Film Commission, paris a s’agiudu de ERSU – Ente Regionale pro su deritu a s’ Istùdiu Universitàriu de Casteddu, Ticonzero, Sotziedade de Sant’Anna, Contemp0ranea – Litzeu Artìsticu Brotzu de Quartu, DiDstudio e a sos mèdia partner Asian World e Asia Movie Pulse.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22