Si non bi l’ades mai bidu non podides cumprendere su chi si podet vivere in sas biddas sardas a carrasegare.

Lassade perdere sas isfiladas fatas po ispantare sos turistas, su chi est aberu non est cussu. Su carrasegare in Sardinna est una de sas massimas espressiones de s’istoria de custa terra goi antiga chi non est possibile a acatare origine a custas cosas in su tempus connottu.

Podimos pessare medas cosas, faghere ipotesi, ma sa veridade est chi b’at sardos chi custu carrasegare lu tenent aintro, in su sambene.

In Otzana, in uve b’est unu de sos carrasegares prus antigos bi sunt sas caratzas de sos boes e de sos merdules chi paris cun sas mascheras serias trasformant dae semper sa bidda in su chi non podet esssere in su restu de s’annu. Sa caratza de linna ti cambiat, su mucadore ti faghet busu, sas peddes ti faghent mannu, sas sonazas ti daent su ritmu.

B’at pitzinnes otzanes chi sunt chintos de personagios de sa modernidade e si ponent a brincare o a iscudere che merdules, ca s’atitudine e su gustu est cussu e non b’at de isballare.

Za sunt bellas sas associatziones chi si mascherant e non faghent a connoschere in totu su mundu, ma sa cosa prus bella est cando bies mascheras chi in manera ispontanea, detzidint de si mascherare po divertere.

Non est facile a lu contare, tocat de lu viere.

B’at tempus, sa prima essia est su 16 de ghennarzu, sa die de s’ogulone de Sant’Antoni.

M.B.

Attività realizzata col contributo della Regione Sardegna – IMPRENTAS 2020-2021. LR 22/2018, art22