Sa Sardigna: terra granitina, antiga, forte. Ma non bastat. S’ìsula nostra est fintzas bartzolu de iscurigadòrgios callentes e ispantosos, de prajas biancas in ue est praghile a bi passigiare iscurtzos, de colores e vistas chi nde bogant su sùlidu. E ite si cheret de prus romànticu de custu?

Sa Sardigna est rica de logos pro fàghere ispantare a s’amorosa/u nostra/u, in ue faghet a nche passare un’iscuta ispetziale, in ue faghet a si nche lassare tragare dae un’atmosfera de maia e dae sos sentidos bonos. Custos sunt sos chimbe logos intra de sos prus romànticos de s’ìsula.

Su Bastione de Saint Remy in Casteddu: chie est de Casteddu lu connoschet bene, pro ite est sena de duda peruna unu de sos sìmbulos de sa tzitade. Est unu fàbbricu maestosu chi s’agatat in su tzentru istòricu e chi leat su nùmene dae su barone Saint Remy. Lu formant una “passigiada ammantada” e unu terratzu dae ue si podet gosare de unu panorama bellu meda e (si si cheret unu clima prus romànticu) de un’iscurigadòrgiu ispantosu.
Sa Praja in colore de rosa: s’agatat in s’artzipèlagu de Madalena, a sud-est de Budelli. Est una de sas prajas prus bellas de s’ìsula e leat su nùmene dae su colore de rosa de sa rena, rica de cantigheddos de coraddu, granitu, còrgios de còtzula e de cotza. Sa rena est in colore de rosa pro more de unu microrganismu de cussu colore chi bivet in intro de sa còtzula e in sa pagiamarina: cando sa còtzula si nche morit, s’abba nche tragat su còrgiu a sa praja e, cun su tempus, si faghet a pimpirideddos. Custa praja, pro l’amparare, si podet bìere dae sa barca ebbia, ma est comente si siat un’ispetàculu ispantosu e faghet a s’acabussare in s’abba crara de custu logu ùnicu e ammajadore.
S’Architu: pro abarrare in tema de prajas non podet mancare S’Architu, in is costeras de Cùglieri, a pees de Monteferru, a nord de sa biddighedda de S’Architu. Est una contra de roca bianca bianca chi imprassat una prajedda e si presentat cun un’arcu in mesu, chi s’est formadu pro more de sa freadura naturale de sa roca carchinàrgia. In antis de leare sa forma de arcu chi connoschimus oe, fiat una gruta. A custu monumentu naturale ispantosu si bi podet arribare dae sa biddighedda e, a s’iscurigadòrgiu, est un’ispetàculu ammajadore e romànticu a beru.
Casteddu Sardu: est in provìntzia de Tàtari e est una de sas biddas prus bellas de totu sa Sardigna e fintzas de totu Itàlia. Est de orìgine medievale, ricu de museos, palàtzios, pratzas, fàbbricos antigos bellos a los bisitare e, a pagu tretu, de prajas cun abba crara e rena fine fine. Intra de custas una de sas prus nòdidas est sa de “Lu Bagnu”. Unu ligàmene intra de bellesas naturales e istòricas, cun panoramas chi lassant sena de sùlidu e chi bos ant a lassare a buca aberta.
Bellavista de Nèbida: est a 20 minutos dae Igrèsias, chi Nèbida nd’est una fratzione, unu logu mineràriu betzu chi contat oe prus pagu de 1000 bividores. In s’intrada de sa bidda, a manu manca, s’agatat sa bellavista nòdida, una passigiada chi dat cara a sa costera otzidentale cun unu panorama ispantosu a fache de su Concali su Terràinu de Masua. Unu logu tropu bellu pro bi passigiare, mègius a s’iscurigadòrgiu, mancari a pustis de una die passada in su mare de Cala Domèstica, pro castiare su sole isparessende in su mare in una vista comente si nde podent bìere pagas in Sardigna. Dae sa bellavista faghet fintzas a lòmpere a sa laveria antiga La Marmora, fraigada cun matones e pedra a vista: pro bi lòmpere tocat a fàghere 400 iscaleris (a punta a susu parent de prus) ma, cando si b’arribat, sa vista est unu bisu.

A prus de custos logos romànticos, in Sardigna nde tenimus medas àteros: dae su Cabu Spartientu, a sas ruinas de Nora, a sos bastiones de S’Alighera, a sa bellavista de Cabu Sandalo e unu muntone de àteros logos, totu ambientatziones ispantosas pro chie chircat unu clima romànticu che in unu bisu.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22