Cinzia Novati est una piciochedda stràngia. Sissi, poita est una picioca briantzola schissiada po sa terra nosta, chi at fatu unu scioberu de vida lassendi sa Briantza po si ndi benni a bivi innoi, a Cabuderra primu primu. E in Cabuderra ita at fatu? s’at imparau su sardu, bivendi in d-una domu ancu su sardu fiat sa lìngua de dònnia dii e de totus. Aici dd’est bènniu amarolla puru a si ddu imparai, a parti su prexeri, ca sa famìllia puru est una famìllia de disterraus in Brasili anca is lìnguas de fueddai funt sèmpiri stètias medas.

Apustis, is cosas de sa vida nci dd’ant portada a Santa Sparau innui est bivendi cun su sposu e is fillus. Sa passioni po su sardu perou dd’est aturada, impari a s’atra passioni sua manna de sa poesia. At printzipiau cun sa fueddada sua briantzola e at printzipiau beni, giai ca is poesias suas funt lòmpias in manus de Van de Sfroos puru, ma at sighiu cun cudda lìngua noa chi a bellu a bellu dd’est crèscia aintru e at incumentzau a ndi bolli bessiri a foras po depi contai.

Aici est nàscia Piciochedda Stràngia, s’arregorta de poesias scritas in sardu e pubricadas de su Cenacolo di Ares. Ma sui chi fait spantu diaderus no est su fatu chi una continentali si siat posta a scriri in sardu, no est sa prima stràngia chi est faendiddu, ma ca su chi at scritu siat bellu diaderus, fungudu e dilicau. Poesias chi contant de issa etotu, de sa vida in su sartu, de manera gentili e fintzas sensuali a bortas. Sa cosa curiosa est a ligi una poesia chi est scrita in sardu ma no parit filla de una “estètica” sarda, de su connotu assumancu, chi ti fait una spètzia de “cortocircùitu”, bonu e prexerosu, poita a pagu a pagu ddui imbucas, ddui aciapas suci e passioni, e mancu ti ndi sapis prus ca funt is fueddus de una piciochedda stràngia e ti parint sardus etotu.

T.C. 

Attività realizzata col contributo della Regione Sardegna – IMPRENTAS 2020-2021. LR 22/2018, art22